今日係十全十美o既好日，好多人結婚呀﹗
可惜都冇我份。
曾經我以為bubu係藍籌，我好快可以有自己o既家庭，可以有安穩o既日子。我記得相識當年匯豐值130蚊一股，我用晒成副身家都買唔到半股。果時覺得bubu可靠，佢話過佢以為佢前女友係佢結婚對象，所以我覺得佢係會想快d成家立室o既。到今日，匯豐只係值81蚊，而我仍然都係一個人。
我成日諗，係咪我有d咩唔好o既地方，所以佢一直都無動於衷。我亦唔明點解佢永遠都唔承諾我任何野，不論係咩事，佢都唔會承諾。
年復年，我有d 覺得我等得太久啦﹗
以前係朋友，我等左好耐佢至表白；
然後係男女朋友，我又等左好耐至睇得到「愛你的」下款；
然後而家已經係第五年，我連一個結婚o既計劃、甚至一d眉目都feel 唔到。
我真係等得太久啦﹗
有時我會好想扯佢衣領，問佢到底娶唔娶我。
近呢幾個月，我發覺我o既身體真係開始老化左。體型、面型、心態，甚至氣色，都老左好多呀。本來應該同結婚係無關係，但係我真係好感嘆，我地長期聚少離多，又從未一起生活過。如果佢過多2 3年至同我結婚，我真係覺得好慘囉，要娶個老女人返去，而少女o既氣色已經盡失lu。
所以我成日都想o係仲有年青o既氣色o既時候結婚，有返一種「因為我們相愛，所以結婚」而不是「因為我們一起久了，是時候結婚」。
有同佢討論過計劃結婚o既問題，可惜個回應令我覺得太差。講真，我自己開口問我覺得好cheap，但係我都想有個打算。bubu話我成日煩住佢呢樣野，又話我冇諗過個可行性。我從來冇諗過講結婚都有「可行性」呢樣野，而家我又唔係男人，異性通婚係合法架，有咩唔可行。佢話我地而家冇地方住，又冇錢買樓比首期，租樓又覺得唔抵，佢屋企又冇地方比我住。然後再話，而家份工又未返定，結婚洗好多錢唔想一次清袋。
我明白，但係我唔可以完全認同。
我唔認為錢係可以阻礙人結婚o既野。大把人收入少過我地，一樣結到婚生幾個小朋友。唔通真係要等佢做到特首我至有得嫁？﹗savings 越多結婚開支越大，我唔明點解佢冇咁諗到。
延伸落黎我就覺得，佢根本唔想o係呢幾年同我結婚。有時一個人對大家o既野上唔上心，好易睇得出。我同佢一起睇結婚或者地產o既，佢個反應同我拉住佢去淘寶睇手袋一樣，no interest；但係佢睇旅行o既資訊或者投資果d 資料，佢係blingbling 眼。
咁我有咩好講？
有冇心，一睇就睇得出。
我只可以話，我呢2年，仲有機會識第二個，到時有咩變化，係咪都唔可以怪我呢？﹗
沒有留言:
張貼留言