榨菜肉鬆粢飯

 

好耐冇post 我d 地獄作品。

打從有朋友提起食粢飯，我就好想自己整。

不過呢，天氣好凍呀，唔想落街買油條，不如算啦，落少樣啦﹗

材料：
糯米 2杯
肉鬆 要好多
榨菜 要好多

做法：
1. 浸糯米過夜
2. 糯米連1/3水蒸半小時，間中要噴下水，如果唔係面頭果D 硬到乜咁
3. 用壽司果個蓆，攤開D糯米飯，要快，放晒D 料入去，卷埋一碌

細個時爸爸返工好辛苦，冇乜時間食飯，我媽媽會煮D飯，連埋D魚肉卷到好似一碌粢飯咁帶比我爸爸食。如果果日我同家姐都一齊去，我地就會同媽媽一起整呢個假粢飯。果時真係覺得好好玩，因為可以自己一人整一份午餐，仲可以帶出街食。回憶入面仲閃過果D大中細不同SIZE的飯團，同埋暖笠笠咁再用D厚毛巾裹住黎保溫，真係窮得好玩又開心。

不過唔知係咪因為咁，我爸爸養成左乜都揸埋一舊黎食的習慣。佢而家食菠蘿飽會將佢揸埋一舊、PIZZA都會卷起黎食，好攪笑又好肉酸。